Thursday, February 19, 2009

ولاني في يوم حبيت عيل

الكلام ده مش كلامي ده كلام صديقتي رحاب يعني حقوق النشر محفوظة لرحاب:))))))))
امبارح صوتك طمن قلبي
الهي يا رب يطمن قلبك ويرسيك
عارف ليه قلبي اطمن؟
لان كلامك كان مترتب
كان طبيعي مش متكلف
كل كلامنا كان احلام
وعلي صخور الواقع شفناها حطام
يمكن كان الموقف صعب شويه
لكن عدي وانا اطمنت
عشان اتكلمت
زعقت وهددت
وصوتك غطي الدنيا
مش مهم ايه قلت
المهم اني اطمنت
حلم جميل بكرة علي كتافه بنيت
لكن الظروف جت بالعكس
هدمت حلمك فاتهديت
وعشان عارف اسباب ظلمك
وضياع حلمك فاهديت
ايه رايك لو احلي الاحلام ضاعوا
راحو في ثانية من غير سابق انذار
زي الاعصار
بعد ماكنت مصاحب حلمك انت وهو وبس
وبنتظرك تيجي معانا
عايشة علي وعود بالهمس
التتويه كان اسلوبك وما بياس
بكره حانعمل بكره نسوي
شد شعور كسر كراسي
وكل سعادتك في خناقة
وبتتمنظر انك غيران
وانك طفل صغير غضبان
وادي يا ابني صبري عليك اصبح الوان
لكن تيجي بعد ساعات من غزلك فيه
وتقول حيران
قلبي في مكان وعقلي في مكان
اما ده لعب عيال بصحيح
هو ده كان حب ولا تفاريح
لعبة لعيل يلعب حبه وبعدين
ينزل تجريح
انا مش لعبه
يمكن صبره
يمكن غاوية غلبه
لكن مش هبله
ولا عشقتك في الضلمه
حبيتك لانك بنعرف تحلم
والناس دلوقتي مابتحلمش
او بتحلم ولا تنفذش
فربط حلمي النونو في ديل حلمك
فاتكعبل واتعور
ولا صرخش ولا عيطش
ماتعودش يبان خسران
وبعد شوية قررت
انك صعب الاستئصال
وان فرقك ارضي حرام
وفكرة قتلك اوالغائك من احلامي
محال
وفكرة اصحاب مرفوضة
ونسيانك وتحويل مؤشر قلبي
مش مقبولة
فخليك قاعد
واطنطت فوق اوراقي
واخرج وادخل مع انفاسي
لا بارادة ولا استاذان
فخليك قاعد
طفل صغير وبيتفرج علي المراجيح
قلبي وعقلي بالنسبه لك
مراجيح
وانا من صغري بموت في العيد والمراجيح
وبما اني كبرت وانت يا عيني لسه صغير
حالعب دور امك وامري لله
ياله مانا فاضيالك
لكن حاسب
ماهو مش كل قلب تحبه وتجري حايعمل امك
ولا كل ماينكسر حلمك حاتلاقي الكل بيجري عليه
ويلم الجرح ويداويه
يمكن واحدة تصرخ
يمكن غيرها تموت من الحزن
لكن تعمل زي لا تظن
تسمع صوتك علي التليفون تعبان تتجنن
او تستشعر ضيقك فاتحن
واصرخ يمكن
اعند يمكن
اضحك يمكن
حب تهور حب الام
طبعا تسال انا ليه باحكي
بعد الصمت ده الفيلم
انا فاهماك والله مابشمت
كل الحكاية اني خفت اكون جواك اتلغبط
لكن بعد سماعي لصوت رفضك ولماضتك اطمنت
ياريت تعرف ان الام بتفضل تدعي علي الابن انه يجيله ويحط
لكن لو سمعت غيرها بيدعي
ممكن يا عيني في كرشه تنط

No comments:

Post a Comment